يقولك المستور انكشف وبان وطلع عليه النهار للجنة الموقتة لإدارة اللجنة الأولمبية الكويتية بفضيحة ( يادافع البلاء ) لا تحدث سوى في الكويت ست الحبايب ياحبيبة .. قال ايـــه الرياضة من بيت ابوها تضرب وتقصف جبهتها وينكسر زجاجها ونوافذها بعد ان تكشف ضلوع تسعة اتحادات ( مره وحده ) في ايقاف النشاط الرياضي في دولة الكويت ( موسيقي حزينه بالخلفية ) !.. وهالخبر أكيد مؤكد وضح النقا بعد ان افضت التحقيقات التي قامت بها اللجنة الموقتة لإدارة اللجنة الأولمبية بهذا الامر .. حيث اكتشفت اللجنة الأولمبية الموقره اسم النبي حارسها بعد الهنا بسنه كتب تثبت دعم وتأييد وتواطؤ هذه الاتحادات مع اللجنة الأولمبية المنحلة .. ياسلام سلم على هذا الاكتشاف الخطير والله طلعتوا مو هينين يخزي العين عليكم وخمسه وخميسه عليكم وحصوه بعين اللي ما يصلي على النبي .. فعلا أكتشاف ماله مثيل بس اموت واعرف هل هذا الاكتشاف تم من قبلهم ام بمساعدة اطراف اخري على سبيل المثل الاستعانة بالمفتش كورومبو او غيره من ابطال أفلام الكرتون !.. ياناس يامكتشفين كل هذا يعرفه رجل الشارع الرياضي والغير رياضي من اول يوم تم فيه الإيقاف يعني ماهو شي جديد !.. اقول شوفوا لكم شماعه غيرها تعلقون عليها فشلكم برفع الإيقاف الرياضي عن الكويت اللي والله واعلم انه راح يطول فوق ماتتصورون دام فيه تخبط بالقرارات وعنجهيه !.. ومن هذا المنطلق راح أسدي لكم نصيحة ياليت ترجعون كل شي زي ما كان زي الاول حتي ينصلح الحال الرياضي واتركوا عنكم العناد اللي ما ورآه سنع !.. ولعلمكم الاعتراف بالخطأ فضيله وسعاد وامل ومني ماهو ضعف وسلامتكم من العين والحسد .
‏‫