بيوم من الايام كنت جالس بمقهي من مقاهي وسط البلد بالقاهرة لا لي ولا علي .. ماغير جلست استمتاع بكوب شاي كشري وشم ريحت المعسل بتدخين سلبي والعيون طايره بخلق الله مره رايحه يسار ومره مع كل زول مو اكثر وربنا شاهد علي كلامي لان اخاف يروح بالكم بعيد ان انا ادخن شيشه او احب التسكع على الطرقات .. ومن واحد لواحد ينتشر الخبر ويصير بكل سكه يمر لين يجي حارتنا وعقبها عيني ماتشوف غير الهالات السودار .. ما عليه طلعت فاصل ورجعت لكم ثاني (يارب عيونكم ماطوفت كم سطر ) الشاهد يا اخوان ماهي إلا كم دقيقه وفجأة وقف تاكسي ونزل سواقه والزبون اللي راكب معاه .. وبدت معركة التكمخ حامية الوطيس اشي شلوت واشي بونيه على كم طراق متبادل الاطراف وقع على اثرها الزبون ارضا وعندها صاح السايق باعلى صوته قائلا اللي يحب النبي يضرب ياجدعان .. وماهي إلا ثواني وكل اللي بالمقهي والشارع وانا معهم نضرب الزبون (على ما اظن هذي نخوه واللي ينتخي حنا معاه) ضرب لين انتفخ جلده ما تركناه إلا يوم سمعنا صفارة سيارة الشرطه عندها هرب الجميع وانا معهم قبل لا ادفع الحساب والزبون متمدد يسبح بدمه .. وكل ما مضي صار وانا لليوم ماني عارف وش قصة راعي التاكسي وزبونه اللي انغسل شراعه .. واليوم بالكويت وعقب كل هالسنين (الله على ايام الشباب) قمت اشوف بام عيني سالفة اللي نخوة راعي التاكسي يحب النبي يضرب ياجدعان برياضتنا المحلية اللي اخذت دور الزبون لان الكل صار يضرب فيها ابتداء من تهديدات الفيفا المستمرة بتجميد (دجاج ثلاجه) النشاط الكروي في الكويت مرورا بمسئولينها المحليين واهلها والقائمين عليها (اللي يحب النبي يضرب ياجدعان ) والحكومة ومجلس الامة (اتقوا الله بالشباب) ورجل الشارع من هواة ومحترفين والاتحادات الدولية واللجان الاولمبية القارية والعالمية والصحافة ( اللي يحب النبي يضرب ياجدعان ) والتلفزيون والبرامج الرياضية الاذاعية والفضائية وحتي اللي مايعرف بالرياضة قام يدلو بدلوه فيها وهو يردد اشمعنى الكرة مدورة ماهي مربعه ؟ .. يعني رياضتنا صارت هي الحديث الشاغل للكل ايه ليش ؟ .. الله واعلم ! .. مادري هل هو حب لها او حب التسلق هو من يقف وراها ؟ .. والله شي يحير وضع رياضتنا ! .. الناس تتطور وحنا على طماط المرحوم مو طمامه عند اتفه سبب ( اللي يحب النبي يضرب ياجدعان ) صدرنا مشاكلنا خارجيا لابارك الله بكل حاسد لرياضتنا واللي يحب النبى يدعي لرياضتنا بالخير ياجدعان وسلامتكم .
ألووو اخير : باللي يربط في رقبته حبل الف من يسحبه .
