الناس خيبتها السبت والاحد وخيبت الشارع الرياضي الكويتي ما وردت على احد يعني الاثنين والثلاثاء والاربعاء والخميس بس نستثني منهم الجمعه لانها عطلة .. وخيبات الشارع الكروي بطلها الاتحاد الكويتي لكرة القدم اللي كل يوم طالع لنا بطلعه جديده .. حنا ماخلصنا من خيبة بطولة الخليج ومدربها فييرا اللي كانوا يعيبون عليه تواجده الدائم بالامارات وبدبي بالتحديد لانها مقر سكنه الدائم اشلون مادري ؟ .. على حساب شغله بالكويت ومنتخبها .. طلع لنا المدرب الجديد نبيل معلول اخر حلاوه (مزيان) بعد ان عمل لنا البحر طحينة وقلب اللانش سفينة بكلامة عند توقيع العقد بانه راح يعمل حاجات (برشا) وراح يعمل (باش نقولك) اي لاعب غير منضبط ماله مكان بالمنتخب حتي لو كان نجم النجوم يبي الانضباط ولا غيره والمستوي مو ذات اهمية عند الانضباط .. وان المنتخب سيشهد غربلة بالاسماء وخلاص انتهي عصر القائمة المكتوبة (رد بالك) وانه يسعي الي بناء منتخب يستطيع المنافسة على كل البطولات .. كلام جميل ومنطقي وهذا هو بداية العمل الصحيح على الاقل يحلل قيمة العقد ابو مليون ونص دولار على حسب ماسمعنا .. بس اشلون وهو غير متواجد بالكويت ؟ مادري هو مخاوي وعنده قرين يعلمه بكل الاسرار ! .. والله شي عجيب هالمدرب بيعمل كل شي وهو بالدوحه اشلون انا مادري ؟ .. ما عليه هذا مو ذنبنا كشارع رياضي لان حنا تعودنا على الهزائم (كل همنا تقليل عدد الاهداف بشبكة منتخبنا) .. بل هو مسئولية ذنب اعضاء الاتحاد اللي عاجبهم الوضع؟ .. باش نقولكم قال ايه لما سألوه عن عدم سبب تواجده بالكويت لاختيار لاعبين المنتخب كان جوابه بلهجته التونسية الجميلة مش شغلي اشوف المباريات (شكون قلك ) واكتب التقارير .. عندي ستاف حنا نعمل باحترافية ساعة ساعة هي الدوحة بعيدة (هكا هو ربي يعيشك عالسلامه ) .. والله خوش مدرب (امورك باهيه ) وخوش اتحاد ( اشنوا احوالك ) عاجبه وضع مثل هذا يعني الحبيب جايبينه يشتغل مدرب لمنتخبنا بالمراسلة .. والله خوش سالفة الناس تتطور وحنا بالكويت للخلف در (وقتاش ) نتعلم ونفهم ونستوعب الدروس والا حنا عايشين بكوكب بروحنا ؟ .. ومنا الي القائمين على امور الكرة بالكويت اشتغلوا صح والا الله يبارك فيكم فيه الف وسبع انفار ودهم يشتغل بمكانكم ( وعد ربي علي ايامي ) وقبل الختام عزيزي القارئ يارب اكون قدمت لك مثال حي للادارة السيئة الغير مبالية اللي كل همها الجلوس على الكرسي بالرغم من الاخفاقات المتكررة .. انا مادري هالناس ليه ما تتعلم من الدرس اللي قدمة لنا الامير عبدالرحمن بن مساعد رئيس نادي الهلال الذي استقال بعد خسارتين لفريقة بالمباراة النهائية مع العلم انه داعم للنادي من جيبه الخاص على العكس من اصحابنا اهل الفشل وسلامتكم .
محمد خلف الشمري
كاتب رياضي كويتي
