فيما يبدو ان التعصب الرياضي الاعمي اللي ضارب اطنابه هاليومين بالساحة الرياضية الخليجية .. قد استفحل وتفلطح وانتفخ بكل مكان فبعد مواقع التواصل الاجتماعي اشوفه وصل لجرايدنا المحلية بالكويت .. يعني مو كافي لنا اسبوع وحنا نسمع مهاترات جماهير الهلال وجماهير النصر حول منهو احق بالعالمية ؟ .. وهل الهلال يحقق بطولة اسيا للاندية ؟ .. (للاسف خسرها وخيرها بغيرها ) وضعنا بالطوشه وانقسم الشارع الرياضي الخليجي بينهم وكل واحد يدلو بدلوه بهالموضوع وهات ضغاط بينهم بكلام اقرب مايكون للجنون من العقلانيه .. هذاك يقول كلمة وهذا يردها عشر وللاسف بعض الكلام جارح ويخدش الحياء بعيدا عن تعاليمنا وقيمنا الاسلامية .. ايييه ليه ؟ .. الله واعلم مع ان المتسبب بهذا التعصب هو الصحف اليومية السعودية اللي فاتحه بيبانها لكل واحد يقول اللي عنده دون حسيب ولا رقيب بلا خطوط حمراء ( والهدف الاول منها بيع اكبر عدد من الاعداد بالاضافة الي كسب ولاءات ناس تدفع من الطرفين ) ويوم وراء يوم والعملية شغالة حتي استفحل داء التعصب الاعمي بالشارع الرياضي الخليجي .. وبما انا بالخليج اشوفه وصلنا بالكويت حيث كتبت وحده من جرايدنا من من تدعي الاصلاح الرياضي كلام ابعد مايكون عن الروح الرياضي حيث نشرت موضوع بربع الصفحة الرياضية من فوق خبرا وصورتين الصوره الاولي عن امتلاء مدرجات درة الملاعب عن بكرة ابيها بالمشجعين واما الصوره الثانية فهي صورة تسلق محبي الهلال الاسوار العالية لدخول لارض الملعب .. واما الخبر فهو معلومة ليتهم ماكتبوها لانها تنم عن جهل بالتاريخ الرياضي الخليجي والاسيوي حيث كتبوا بان نادي النصر السعودي سبق وان حقق لقب البطولة ومثل اسيا في بطولة العالم ولا يزال يلقب بالعالمي .. وكلامهم صحيح محد يقدر ينكره بس وين راحت مشاركات نادي الاتحاد بالعرس العالمي اشوف سحبتوا عليها والا ماعندكم خبر فيها ؟ .. ايعقل هالكلام وانت جريدة مصنفة من الجرايد الاولي بالكويت والخليج بصفحاتك الرياضية .. احترمونا نحترمكم وهاردلك على هالسقطه الكبيرة بحق نادي الاتحاد وسلامتكم .

ألووو اخير : لازال مدرب منتخبنا للكرة يمارس العك الكروي بتشكيلاته بمبارياته الودية قبل بطولة كاس الخليج .. يابن الحلال ركز واركد البطولة اصبحت على الابواب وانت شيل هذا وحط هذاك وان جت البطولة نشوف اللي يلعبون غيرهم ! .

محمد خلف

اعلامي كويتي

aloooyaommm@hotmail.com